الهوية القوطية

 -انت دارية يالول  ليش الحوثيين مصممين يطمسوا من اذهاننا ومن وجداننا الجمعي موضوع الهوية الوطنية اليمنية؟ 
وشغالين باقوى قوتهم ليفرضوا علينا "الهوية الايمانية" نيابة عنها ! رغم ان احنا مؤمنين  بالفطرة  والرسول نفسه قال : الإيمان يمان .. والحكمة يمانية 
- والله لا مالي علم ياموسمك !
- طيب انت عارفه ايشو الفرق بين الهوية الوطنية اليمنية  الجامعة اللي يشتوا  يطمسوها من الذاكرة ..
 والهوية الإيمانية اللي جالسين يزفوها لنا في كل مجبر .. وماكودهم يحشرونا فيها صميل ؟ 
- وحتى هذي والله مالي  علم  ! 
- اممممم .. 
طيب تعرفي الفرق بين الصحن والقوطي ؟ 
- ماهذي اني داريه بها اكيد ..
الصحن وعاء براح كبير 
والقوطي وعاء ضيق صغير
لكن مادخلهن في الموضوع؟ 
- صح مالهنش دخل .. لكن لو اخذناهن من باب المقارنة والتشبيه بس  شتفهمي الفكرة ..  وشتتضح لك الصوة وشتعرفي بان الهوية الوطنية اليمنية مثل " الصحن" تتسع للجميع . 
لتعز وصنعاء وعدن وحضرموت والحديدة ولمن يختلفون في السياسة وفي المذهب واللون والعرق .. ولكنهم يتفقون ؛ في نهاية المطاف على أنهم يمنيين وبس .
واما  الهوية الإيمانية فهي ضيقة وصغيرة بحجم "القوطي"  وتخص فئة محدودة في المجتمع وبس .. وعلى هذا الاساس ؛ فأن الفرق بين الهويتين ؛ واضح وبسيط  .  
 الهوية الوطنية اليمنية تقول لنا : كونوا يمنيين وبس ؛ وهذا  شرطها الوحيد ؛ لنكون شركاء في الوطن. 
وأما الهوية الإيمانية القوطية فتقول لنا بكل صلف واستكبار : كونوا حوثيين وبس .. وابردوا لكم من ام الهوية الوطنية الخبلا  ..  وامشوا بعدنا وبس إحنا القوطيين امتداد النبوءة وامتداد الرسالة السماوية 
احنا الله واحنا الرسول 
واحنا السادة واحنا القادة 
واحنا اعلام الهدى 
- ناهي هم كل هذا واحنا ماهو  ؟ 
- احنا عندهم مجرد زنابيل وماعلينا إلا الإيمان بهم  
والطاعة والخنوع والانصياع الكامل لإرادتهم  ولسلالتهم  ولهويتهم الإيمانية الشخصية و للمسيرة القوطية .. 
مالم فأحنا خونة وزناديق ومرتزقة وعملاء لتحشيدات العدوان السعوصهيومريكي   
يعني باختصار 
يشتونا ننسى هويتنا الوطنية الجمهورية ونقع قوطيين صميل والا ماسبرتش! 
هيا مارأيك يالول ؟ هو يسبر ؟ 
- ياظاك قد احنا على #صحننا  كيف ماوقع أيركبمه القوطي هذا 
وحراااام مانحتشر داخله لو ماعد بقي في اليمن راس